Komisiyo y’ubumwe n’ubwiyunge iratangaza ko hagiye gutangizwa ihuriro ry’ubumwe n’ubwiyunge ku rwego rw’umudugudu hagamijwe gukomeza gushimangira gahunda y’ubumwe n’ubwiyunge mu banyarwanda

Iyi gahunda yatangajwe mu gitondo cyo kuri uyu wa Kane taliki ya 12 Nzeri 2019 na Komiseri muri komisiyo y’ubumwe n’ubwiyunge Bishop Gashagaza Deogratias ubwo yari mu Karere ka Gatsibo mu nama yahuje abagize Komisiyo y'Ubumwe n'Ubwiyunge, Ubuyobozi bw'Akarere n'inzego z'Umutekano.

Inama yahuje intumwa za komisiyo y’ubumwe n’ubwiyunge n’ubuyobozi bw’Akarere ka Gatsibo yariigamijekurebera hamwe uko gahunda y’ibikorwa by’ubumwe n’ubwiyunge yashyizwe mu bikorwa mu mwaka w’ingengo y’imari 2018/2019 n’ibikorwa biteganyijwe 2019/2020.

Bishop Gashagaza Deogratias,Komiseri muri komisiyo y’ubumwe n’ubwiyunge yavuze ko taliki 1 ukwakira 2019,hazizihizwa ukwezi ku bumwe n'Ubwiyunge no gutangiza ihuriro ry'ubumwe n'Ubwiyunge ku rwego rw'umudugudu.

Umuyobozi w'Akarere ka Gatsibo wungirije ushinzwe iterambere ry'Ubukungu Manzi Theogene yavuze ko Ubuyobozi bw'Akarere ka Gatsibo buzakomeza gushyira imbere no gukurikirana ibikorwa by'ubumwe n'Ubwiyunge na gahunda ya Ndi Umunyarwanda.